Doktor Nurəddin Qərəvi Azərbaycanın azadlığı, ana dilimizin qorunması uğrunda illərlə usanmadan mücadilə edən, qəlbi Vətən sevgisi ilə aşıb-daşan soydaşlarımızdan biridir. O, 1945-ci il aprelin 22-də Təbrizin Surxab məhəlləsində, Qızıldağın ətəyində dünyaya göz açıb.

Hələ 7-ci sinifdə oxuyarkən Bakı radiosuna məktub yazaraq Azərbaycan dilində dərs kitablarına və sözlüyə böyük ehtiyac olduğunu bildirməsi gənc soydaşımızı İranın “qara siyahı”sına salıb. Amma sorğu-suallar, ciddi nəzarət onu qorxutmayıb, əksinə, qəlbindəki azadlıq yanğısını bir az da alovlandırıb, Azərbaycan sevgisini daha da böyüdüb. Şah rejiminə qarşı farsca və Azərbaycan türkcəsində yazılar yazıb, onları yaymağa başlayıb...

Nurəddin Qərəvi ömrünün bütün vaxtlarını təzyiqlər altında yaşayıb, hücumlara, təhqirlərə, fiziki şiddətə məruz qalıb. Lakin doğru bildiyi milli mücadilə yolundan heç zaman dönməyib.

...Azərbaycan sevdalısı Nurəddin Qərəvinin artıq 79 yaşı var. İndiyə kimi 30 il öz hesabına çıxardığı “Ana dili” qəzetində Azərbaycanın mədəniyyətini, musiqisini, elmini təbliğ etsə də, Qarabağ mövzusunu, ermənilərin xalqımıza qarşı törətdiyi vəhşilikləri, Xocalı soyqırımını bütün dünyaya yaysa da, ömrünü qərib ölkələrdə yaşasa da, yenə “nə qədər sağam, Vətənə qulluq etməyə hazıram”,- deyir.