Dünya Azərbaycanlılarının Beynəlxalq Fondunun dəstəyi ilə Ukraynanın kurort şəhəri olan Truskavetsdə Azərbaycan-Ukrayna Dostluğu çərçivəsində Müslüm Maqomayevin xatirəsinə həsr olunan VI Beynəlxalq Vokal Müsabiqəsi keçirilib.
Müsabiqədə Ukrayna və Çinin müxtəlif şəhərlərindən olan peşəkar müğənnilər ilkin seçim mərhələsindən keçiblər.
Müslüm Maqomayevin opera ariyaları, estrada mahnılarının ifa edildiyi müsabiqənin qalibi Odessa Konservatoriyasının məzunu İnna Bobomuratova seçilib.
Mükafatlandırma mərasimində iştirak edən Truskavets şəhərinin meri Andrey Kulçinski tədbirə verdiyi dəstəyə görə Dünya Azərbaycanlılarının Beynəlxalq Fonduna, Ukrayna Azərbaycanlılarının Birləşmiş Diasporuna və təşkilatçılara – Müslüm Maqomayev adına Azərbaycan Mədəniyyət Mərkəzinə təşəkkürünü bildirib. Mer çıxışında hazırda davam edən mühribə şəraitində Azərbaycanın Ukraynaya verdiyi humanitar dəstəyi də yüksək qiymətləndirib: “Mədəniyyət cəbhəsi humanitar və iqtisadi cəbhədən heç də az əhəmiyyət kəsb etmir. Mədəniyyət cəbhəsində də Azərbaycan Ukrayna ilə bir yerdədir. Bu, ən yüksək siyasi səviyyədə tanınır”.
Müsabiqədə Ukraynanın Xalq artisti Qurban Abbasov və Ukrayna Azərbaycanlıları Radasının icraçı direktoru Elşad İbrahimov iştirak edib.
Qeyd edək ki, müsabiqə dekabrın 8-dən 10-dək keçirilib.
