“Diasporla müsahibə”nin növbəti qonağı Birləşmiş Ərəb Əmirliklərində yaşayan tibb üzrə fəlsəfə doktoru, Azərbaycan Könüllüləri Assosiasiyasının xarici işlər üzrə koordinatoru Sabrin Əli Əzim olub.

S.Ə.Əzim müsahibədə hazırkı Azərbaycan diasporunun fəaliyyətindən, ərəblərin soydaşlarımıza olan xüsusi marağından və eləcə də Azərbaycanın dünyada tutduğu mövqeyindən bəhs edib.

O, Bakıya bu səfərinin məqsədindən danışıb:

“Ərəbistana kifayət qədər təcrübələrlə qayıdıram. Diasporlarımız bu tədbirdən əldə etdiyi bilik və təcrübələrə əsaslanaraq yaşadıqları ölkədə yüksək səviyyədə işlər görəcəklər. Xüsusilə də elm adamları bu istiqamətdə ölkəmizi tanıda bilərlər”.

S.Ə.Əzim qeyd edib ki, adətən diasporlarımız birliyin olmamasından, koordinasiyanın zəyifliyindən şikayətlənirlər:

“Mənə görə, diasporumuz gəncdir, lakin diasporlarımız həm mədəniyyətimiz, həm də Zəfər tariximizi qürurla təbliğ edərək Azərbaycanı tanıdırlar. Daha çox tanınıb, lobbi fəaliyyətinə keçmək istəyiriksə, mütəxəssislərin siyahısını əldə etməliyik. Bu məlumatlar həm Diasporla İş üzrə Dövlət Komitəsində, həm də səfirliklərdə olmalıdır. Onlarla mütəmadi əlaqə saxlayıb, kifayət qədər işlər görüb, inkişaf etmək olar”.

Müsahibimiz Azərbaycanda tibbin və təhsilin inkişaf etdiyini bildirsə də xaricə gedən azərbaycanlıların ölkəmizə qaytarılması ideyasını yüksək qiymətləndirib:

“Əlbəttə, təcrübələrini artırmaq üçün xaricə üz tutan gənclərin sayı son dövrlər daha da artıb və çox hissəsi də qayıtmır. Mən Ərəbistanda yaşasam da ölkəm üçün çalışıram. Mənim nə zamansa qayıdacağım barədə fikir bildirə bilmərəm, ancaq gəncləri və yaxud da xaricdə yaxşı fəaliyyət göstərənləri ölkəmizə də cəlb etmək lazımdır. Onlardan faydalanıb, tibbi daha da inkişaf etdirə bilərik”.