D.Quliyeva 8-ci sinif şagirdidir, 4 yaşından violin (skripka) ilə məşğuldur, 7 ildir Viktoriya Musiqi Konservatoriyasının tələbəsidir.

Qonağımız bildirib ki, müxtəlif tədbirlərdə Azərbaycan xalq mahnılarını xarici dinləyicilərə çatdırır. Hətta Dənizin ifasında olan "Sarı gəlin" onun təhsil aldığı məktəb tədbirində təqdim olunub:

“Mütəmadi olaraq Azərbaycan xalq mahnılarını insanlara tanıtmaq üçün mədəniyyət evlərində və təhsil aldığım məktəbdə canlı ifa edirəm”.

D.Quliyeva 2022-ci ilin martında Ukraynaya dəstək proqramına istedadlı iştirakçı kimi çağrılıb. Ukrayna üçün topladığı ianə ilə bağlı konservatoriya tərəfində sosial şəbəkədə paylaşımlar olub.

D.Quliyeva Türkiyə və Suriyada zəlzələdən zərər çəkənlərə dəstək məqsədilə keçirilən konsert proqramında iştirak edib və topladığı ianələri yardım mərkəzlərinə göndərib.

Müsahibimiz əlavə edib ki, beynəlxalq musiqi yarışlarında, festivallarda qızıl medal və sertifikatlara layiq görülüb. Konservatoriyada aldığı təhsilini isə təqaüdlə davam etdirir:

“Mən çox festival və yarışlarda iştirak etmişəm, o cümlədən “Richmond Music Festival”, “Vancouver KIWANIS Music Festival”, “Victoria Art And Music Festival”da yüksək nəticələr göstərmişəm. Üç il davamlı olaraq Torontoda keçirilən Beynəlxalq Musiqi Festivalı və yarışında (2021, 2022, 2023) “Qızıl medal” qazanmışam, 2022-ci ildə birinci olmuşam”.

D.Quliyeva sonda əlavə edib ki, onun bu yolda əsas məqsədi Azərbaycanı və milli musiqilərimizi dünyaya çatdırmaqdır.